.. وكانت القمرة

بحبك وكانت القمره

تكتب بى الشعاع احلام

وكان لسه العشق شافع

وكان كل الحكــايه كلام

مشيتى معاى محل المطره طول العام

محل مارقــــدت الانغام

وكت ما انشرت الاحلام..

رزاز وغمـــــــام ...

ونلعب وكانت الواطه

تكندك فى وشى الايام..

وكان قبل الشرك ناطا

قبل تتغبر الاقـــــدام..

الاقيك والقلوب بيضا

صباحات الله والنسام..

يخربش فى خدود الشوق..

يسجــل فى حضـورنا هيام

واغنيك والحكايه كلام

كبرنا وكبرت الأيام

وكبرت غنوتك فينى

وكبرت انا على جهل الاغانى بكر

الولـــيك بى مشـــــاعرى النوم

ملك ليكى الليالى حكر

وملكتينى وسكنتينى وزرعتينى

واسفاى على طول المسافه سدر

جفت الّمى من جواى

اقالدك ياسموم الصيّ

اتحتيت صفق يابس

واسفــــاى قطعتينى

قبل تنجض مشاعرى وني

وإنضــريت وشالنى هواك

بعيد ياحلوه شتتنى

كبرت وكبرت الايام

وكبرت حسرتك فينى

واتلميتى من جواك بعدما اتبلبلت عينى

بقيت بكاى

مرقتى على تنادينى

بقيت درويش ملمات العشق اطرش

نجضت بعد حريق جواى

واسع جايه بى الماضى

تشرحى حالك الجواك

شنو العندك عشان اديك من الجواى

كفاى اسكب عليك دمع الاسى وابكى

وكفاى رحله عمر جنبك تشخبتي فى بياض قلبى

وانا المجبور اشيل ذنبك براى

براى انضم سبحة الشوق

تنوم انتى وانا الصلاي

اساسق فى دروب الريد وانتى المابتشيلى خطاك

ولا هان يوم تعدى خطاي

واسفاى واسفاى زمان كان العشم باكر

باكر كفتك تتقل ترجح كفة الميزان

وباكر جا

وانتى مطففه وظالمه

ليكى تكيلى بى مكيال

وتدينى حبيبه حب وشوق كُضب

بقر مافى الهديه حبال

مابيقنعنى ظلمك لى ولا ليك عندى طولة بال

ولابتنفع كليماتك ولادمعة العيون السال

ولابتشفع غنيواتك ترانيم الندم موال

خلاص جفت مواعينى

بقت بيكى القلوب غربال

فلا اسفاً على القمره على الضو الكتب احلام

ولا اسفاً على الواطه وكت رسمت خطى الاقدام

بفتح صفحتك بيضاء وعليكى الف سلام

عليكى عليكى الف سلام