عندك خبر .. !!؟

لليلي حبي انا مافتر...

لاجف قلبي من النزيف ..

لا انهد حيلي من السفر ..

شايلك حسيس قلبي البدق ..

إيقاع حياتي علي وتر

يعزف مع الدم مشتهيك ..

زي لهفة الصي للمطر ...

راجيك تبلي الشوق تجي

في موسم الغنا والزهر

يخضر جفاف دنيانا ريــــد

يطرد ضلمتنا القمر

عندك خبر ..!!
لايوم أموت تبريني ياأجمـــــــل قـــــــــدر

عندك خبر .. قلبي البموت بي شوقو ليك ..

يهواكى رغم المستحيل

يهواك طال مانبضو حي ..

وطال مابيسقي أرضنا نيل

يهواكي زي ما العازة ريد

مدلوق علي قلب الخليل ..

يهواك دروب من شوق وشوق

مزروع علي طرف البحر

ومسنود علي أكتاف النخيل

ماقلبي بي شوقك بدأ ..

يا منتهي العشق النبيل


أما الخبر..

ياحلوة لاقدر الأسى

لاالفرقة لاجور السنين ..

يكتم إرادة زول دفن ..

إحساسو في قلبك حنين

مستني نور طيفك يصل ..

ولهفة عويناتك تبين

احكيلا كيف .. الدنيا صيف

وكيفن بلاك الكون حزين


وآخر خبر ....

يــاحــلوة لاتبكي المصــر .. وقـــدر الموالفين الفراق

وقدر المتلنا مشي الهجير .. وسفر الأماني طويل وشاق

يسعدني إنـــك بت هــواي .. تبينــــا مـــن شفع دقـــــاق

مغروسة في جـــوايا ريــــد .. ومحفورة ساساتك غُراق