سلامــــات ..

زمن ما جاني صوتك طاش .. ولا جيت ماري أناديكا
مشحتفة بعـــدك الأحضـــــان علي تبتيب أياديكــــــا

مشيت وين بس عشان أغشاك .. أبل أشواقي ألاقيكا
وزمن ده أنا وإنت والأمواج ..مراكبي وشوق مراسيكا
****
سلامــــــات والفؤاد طاريــــك .. منابع حسو أتاريكا

وراك لاجفن الدمعـــــات .. ولا قصـــــرن لـــياليكا

جفيتني وتهت في الأيام نسيتني أنا ماني ناسيكــــــــا

تعـــــال بالي العليك مشغول كفاهو فتر يباريكـــــــا

****
أرض مجرورة راجـــــية الغيم تشابي علي تقاويكا

أنا الكمترني شوق عينيك وأزاني وجع طواريـكــــا

تــعال أرويني بالآمال ســرابة ســرابة راجيكــــــا

ومتين بس ياسحــاب الخير بتروي لهيب بواديكـــــا!!

****
كتير ونست صمت اللــــيل نشيل ونخت غناويكـــــا

كتير فكرت كيف أنســاك .. متل ماك جافي أجافيكا

غلبني وحــات سواد عينيك مع العابرين أساويكـــا

وشنو الناقصني إشان إرتــاح بالاك وبلا ألاقيكـــا!!

****
حليـــــل يوم طلتك مشــتاق حنين الدنيــا ماليكـــــا

تلومني علي غيابي إرتااح .. وكت تزعل واراضيكا

ومنو الكان زينا الأفـــراح بيملأ حسيس مزازيكـــا

وحليلك والقدر لفــــاح .. ختفني أنــا البضاريكــــــا